షారుఖ్, ఐశ్వర్య, ఎన్టీఆర్‌ను వెనక్కినెట్టిన యువ నటుడు... ఎవరీ యుధ్ వీర్ ఆహ్లావత్?

చిత్ర పరిశ్రమలో ఎప్పుడు ఎవరు స్టార్‌డమ్ అందుకుంటారో చెప్పడం కష్టం. ఒక్క సినిమాతో రాత్రికి రాత్రే అగ్రస్థానానికి చేరిన వాళ్ళు ఎందరో ఉన్నారు. తాజాగా ఈ జాబితాలో చేరాడు యువ నటుడు యుధ్ వీర్ అహ్లావత్. షారుఖ్ ఖాన్, ఐశ్వర్య రాయ్, దళపతి విజయ్, జూనియర్ ఎన్టీఆర్ వంటి అగ్ర తారలను వెనక్కి నెట్టి ఐఎండీబీ (IMDb) ఇండియా విడుదల చేసిన మోస్ట్ పాపులర్ ఇండియన్ సెలబ్రిటీల వీక్లీ జాబితాలో నెం.1 స్థానాన్ని కైవసం చేసుకుని సంచలనం సృష్టించాడు. ఈ ఘనత సాధించడానికి ముఖ్య కారణం, మే 15న నెట్‌ఫ్లిక్స్‌లో విడుదలైన క్రైమ్ థ్రిల్లర్ 'కర్తవ్య'.

ప్రపంచవ్యాప్తంగా ఉన్న 250 మిలియన్లకు పైగా ఐఎండీబీ యూజర్లు సందర్శించే సెలబ్రిటీల ప్రొఫైల్ పేజీల ఆధారంగా ఈ ర్యాంకింగ్ నిర్ణయిస్తారు. పుల్కిత్ దర్శకత్వం వహించి, రెడ్ చిల్లీస్ ఎంటర్‌టైన్‌మెంట్ నిర్మించిన 'కర్తవ్య' చిత్రంలో యుధ్ వీర్ నటనకు విమర్శకులతో పాటు ప్రేక్షకుల నుంచి విశేష ప్రశంసలు వెల్లువెత్తాయి. 

ఈ సినిమాలో, పరిస్థితుల ప్రభావంతో కాంట్రాక్ట్ కిల్లర్‌గా మారే 'హర్పాల్' అనే టీనేజర్ పాత్రలో యుధ్ వీర్ జీవించాడు. అతని సహజ నటన, భావోద్వేగాలను పండించిన తీరు అందరినీ ఆకట్టుకుంది. ఈ సినిమా విజయంతో యుధ్ వీర్ ఐఎండీబీ ప్రొఫైల్‌ను వెతికే వారి సంఖ్య భారీగా పెరిగి, అతడిని అగ్రస్థానంలో నిలబెట్టింది. సైఫ్ అలీ ఖాన్ ప్రధాన పాత్రలో నటించిన ఈ చిత్రంలో యుధ్ వీర్ సహాయ నటుడిగా కనిపించినప్పటికీ, తన నటనతో అందరి దృష్టిని ఆకర్షించాడు.

హర్యానాకు చెందిన యుధ్ వీర్, 2019లో వచ్చిన 'సాండ్ కీ ఆంఖ్' చిత్రంతో నటనలోకి అడుగుపెట్టాడు. ఆ తర్వాత 'లవ్ హాస్టల్', 'కో-ఎడ్' వంటి వెబ్ సిరీస్‌లలో కూడా నటించాడు. తెరపై చిన్న వయసు పాత్రల్లో కనిపిస్తున్నప్పటికీ, తను మైనర్ కాదని గతంలోనే పలు ఇంటర్వ్యూలలో స్పష్టం చేశాడు. తాజా ఐఎండీబీ జాబితాలో కేన్స్ ఫిల్మ్ ఫెస్టివల్‌లో పాల్గొనడంతో ఐశ్వర్య రాయ్ 3వ స్థానంలో, తమిళనాడు ముఖ్యమంత్రిగా రాజకీయ వార్తలతో విజయ్ 4వ స్థానంలో నిలిచారు. జూనియర్ ఎన్టీఆర్ 24వ స్థానంలో ఉండగా, షారుఖ్ ఖాన్ టాప్ 30లో కూడా లేకపోవడం గమనార్హం.

యుధ్ వీర్ విజయంపై సోషల్ మీడియాలో ప్రశంసలు వెల్లువెత్తుతున్నాయి. ఐఎండీబీ ఇండియా ఇన్‌స్టాగ్రామ్ పోస్ట్‌పై స్పందించిన నెటిజన్లు, అతని ప్రతిభను కొనియాడుతున్నారు. ఒక వినియోగదారుడు 'జఖ్మ్', 'మాసూమ్' వంటి చిత్రాల్లోని బాలనటుల ప్రదర్శనతో యుధ్ వీర్ నటనను పోల్చడం విశేషం. మొత్తం మీద, 'కర్తవ్య' సినిమాలోని బలమైన పాత్ర, దానిని యుధ్ వీర్ అద్భుతంగా పోషించడం వల్లే ఈ అనూహ్యమైన పాపులారిటీ సాధ్యమైందని స్పష్టమవుతోంది. ఈ చిత్రంలో రసికా దుగ్గల్, సంజయ్ మిశ్రా, జాకీర్ హుస్సేన్ వంటి ప్రముఖ నటులు కూడా ఉన్నారు. 

చివరగా... చూడ్డానికి మైనర్ బాలుడిలా కనిపించే యుధ్ వీర్ ఆహ్లావత్ వయసు 33 ఏళ్లు.